Калаçаççĕ хурăнпа юман...

* * *

Калаçаççĕ хурăнпа юман

шăкăл-шăкăл, шухă çил чупсассăн,

çил çук чух кăна сывлаççĕ ассăн

е тухсассăн ирсерен тăман.

 

Ыталаймĕ паттăр савнине,

хурăн вуллисем ăна тытмаççĕ,

çулçисем çеç сивĕ кĕркунне

алла-аллăн тытăнса ташлаççĕ.

 

Вĕрен пек тымаррисем анчах

çупăрлаççĕ пĕр-пĕрне ачашшăн.

Юнашар ялан вĕсем пуласшăн,

çыпçăнса выртасшăн çăтăрах.

 

07.01.2019 15:35

Сергиев Посад