ШУКАЕ СЭРЦА БОГА

Сэрца птахам iмчыцца да Бога

У малiтвах, у думках i марах.

У пацёмках шукаю дарогу

Праз хлуслiва-смалiстую хмару…

 

Замянiлi Хрыста сваiм клонам,

Пагублялiся «не» ў Запаветах.

Брод шукаю ў рацэ бездухоўнай,

Сваю зорку, каб шчасце iзведаць…

 

Бо на сэрцы крыжы i распяццi,

Ў абцугах, не падняцца з каленяў.

Клiча сэрца увысь голас мацi,

Ды натхняе мяне, маё рвенне.

 

Збаўлю поле сваё пустазелля,

А зярняты прасею ад жыцiц.

Нi хамут, нi ярмо – а вяселле

Прынясе мне духоўны гасцiнец…