ВЕЧНАЯ ПЕСНЯ

Песня, пакуль, не ўзляцела да зорак -

Край мой у сцюжу святлом азарыць…

Чорны стаiць, камянiсты пагорак,

Промням святла не дае ён ажыць…

 

Песня пакуль што блукае па лузе,

Гукамi будзiць ад чэрствасцi край…

Дуб спарахнелы стаiць, валанцуга –

Ноты глытае iмховы лiшай…

 

Песня яшчэ ўсё завязла ў балоце,

Сцежкi пытаецца ў iм пратаптаць…

Чорныя хмары снуюць дзесь на ўсходзе,

Брудам пытаюцца песнь нашу ўняць…

 

Поўная светлага – вечная песня,

Волi сяброўка, матуля, сястра,

Свята душы i вясны наш прадвеснiк,

Шлях наш адвечны да новага дня…