НЕ ЦУРАЙЦЕСЯ

Не цурайцеся мовы матчынай,

Песні страчанай, лёсам венчанай.

Не цурайцеся роднай спадчыны,

Бо крыжы яе ўсе асвечаны.

 

Бела-русая, не прыгонная,

З промнем сонечным заручоная

Мова матчына – песня вольная:

Акраплёная, асвячоная.

 

Не яна была вінаватая,

І не мы яе так зняважылі,

Запалохалі Курапатамі

І абмазалі чорнай сажаю.

 

Не забітая, не палонная,

Яна выйдзе ў свет каралеўнаю.

Белакосая, не прыгонная,

І прыгожая, і напеўная.

 

Сустракай яе Еўфрасінняю

Ці звычайнаю палачанкаю.

Ёй паклоніцца неба сіняе

Кожнай рыскаю і заранкаю.

 

1989