ВЫБАР I СУМЛЕННЕ

Наш шлях жыццёвы – гэта выбар,

Яго зрабiць заўжды складана.

Схаваны ён у нетраў скiбах,

Густых туманах акаянных.

 

У кожнай справе крок наш першы,

Як у дзяцiнстве, баязлiвы.

Падтрымка блiзкiх заўжды цешыць,

Святло лiе над нашай нiвай.

 

Галоўнае, каб наша мудрасць,

Змагла уразумець хто родны.

Не апаiў вадзiцай мутнай

Хiтрэц, не павярнуў з дарогi.

 

Сумленне наша не запэцкаў –

Яно найлепшы нам дарадчык.

Хлуснёю не прынёс нам бедаў,

Махлярствам не вучыў пляткарыць.

 

Калi з сумленнем выбiраем

Свой погляд i шляхоў напрамкi,

Куток жыццёвы адшукаем,

Сустрэне доля ясным ранкам…

 

Галоўнае, не будзе прыкра

Перад дзяцьмi, душой i Богам.

Не стлее сэрца ў корцы з выгад,

А лёс не стане цьме залогам…