Калыханка з месячыкам

Спі, дачушка, спі, мая малая,

Сні жар-птушкі вечнае пяро.

Сярод зорак месячык блукае

І дадолу сыпле серабро.

 

Спі, дачушка, спі, мая малая,

Дрэвы спяць, і чуйна спяць лісты.

Срэбра ён табе панакідае

У світальны кошык залаты.

 

Спі, дачушка, спі, мая малая,

Бо даўно паснулі казкі ўсе.

Хутка ў вокнах сонейка заззяе

І на промнях ранак прынясе.

 

А пакуль я гушкаю-люляю,

Ды вандруе месяц-пілігрым,

Спі, дачушка, спі, мая малая,

Грэй далоньку носікам сваім.