Пирĕн пурнăç – тăтăш ырату...

* * *

Пирĕн пурнăç – тăтăш ырату,

вăхăт çеç ăна çĕнме пултарĕ.

Пирĕн пурнăç – Джомолунгма ту.

Кам-ши ун çине хăйса хăпарĕ?

 

Пирĕн пурнăç – вĕçĕмсĕр кану

вунтăват сехет ĕçленĕ хыççăн,

хăйне евĕр тĕрĕс ăнлану

çӳресессĕн кашни уйăх выççăн.

 

Пĕр-пĕрне усал кăна ан ту.

Çулăмлантăр вĕçĕм чун кăварĕ.

Пирĕн пурнăç – çирĕп юрату.

Юратусăр пурнăç хĕсĕр мар-и?

 

 

06.07.2018 16:00

Сергиев Посад